Weviel Passantä händ sich ächt im Verlauf vu dä letschtä Jahr gfraget, was das für komisch Figure siged uf dem Chreisel – vor Glaris, wämä undänufä chunnt, zum Schluss, wä mä dr Hauptort wieder verluu hät. D Lösig vu dem Rätsel hät mit ärä Gschicht z tue, wo dr Schang, dr Hans Rhyner-Friitig vu Niederurne anno 2017 gschriiebe hät.
Im Buech «Dr Schang meint … und was meint ds Tiidi?» isch einiges z erfahrä, wo mit dener Darschtellig z tue hät. Viellicht gwünnt «de gneigt Läsärschaft» nüüi Erkänntnis.
Mä muess luut em Schang a di Ziit zrugdänggä, wo im Chlüntel – gnäuer ufem See – Iis abbuä worde und a verschieedeni Ort als begehrts Chüelmittel hanätransportiert worde isch.
Under dene, wo der hert Bruef uusgüebt händ, sig au dr Oberrüteli Schaagg gsi. Der heig nachem Fiirabed albigs mit em Fäldschtächer da- und det hanäglueget und bim Ochsewinggel öppis gseh, wo schu erschtuunli gsi isch. Das heig glänzt we verruggt.
Dr Schaagg hät sich vorgnuu, das abzklärä. Er isch i d Höchi gschtiege und ischan ä Tüür us iirechtem Silber chu. Er heig aaklopfet und ä chliis Wesä heig aagfraget, was er well. Aes het es Hii und Här ggi. Dr Schaagg hät erfahre, dass er sich mit em Gnom Argentum unterhalti und dass er immer ächlei Silber als Dangg überchämm, wän er ä Porziu beschtä und frischä Chlünteler Chääs ufäbringi.
Aber vum Silber törf er gar niemerem und gar nie öppis verzellä.
Das isch nüd lang verborgä bliibe. Dr Schaagg isch uusgfraget worde, und das uf änä Art und Wiis, wo Antwortä nötig gsii sind. Sogar dr Landammä samt em Weibel heiged dr Schaagg i ds Verhöör gnu.
Dr Schaag het Angscht überchuu und alles biichtet. Dä händs uf amtlichi Aordnig hii das Silber wellä gu holä. Aber das Vorhabe isch uuguet usechuu. Es heig uumär tunderet und grumplet. Bi dem Eroberigszuug zur silbrigä Höhli sind de uufbotne Soldate um ds Läbä chuu. Alles isch verschüttet worde und am Schaagg sini schünä Figure sind verroschtet und händ ä khei Wärt mi gkha.
Mä chaas etz glaube oder nüüd: Aes paar Jahr schpeter sind de roschtige Figure uurplötzlich uf em Chreisel gschtande. Niemer weiss äso richtig, we die det hanä chu sind. Vum Silberglanz hät m, ä nüüt me gsii, und das isch guet!
