Mit viiel Sorgfalt isch da zämätreit worde und da drmit ä uughüri Mängi a Erhaltigswürdigem zämächuu. Es isch soviiel gsii, dass es für nä währschafts Buech me as glanget hät, äs sind immerhii fascht drühundertfüfzg Siite worde.
Natürli hät ds Tiidi nüd alles chänne uufzeige a dr Buechvernissasch i dr Bauwollblüetä z Aennedaa. De vorhandenä Schtüel sind rasch bsetzt gsii. Wer sich gkhännt hät, hät sich nuch rasch zuegwungge, hät nuch öppis vum offerierte Apéro zu sich gnuu – und dä isch es ganz churzwiilig und munter losgangä.
Dr Kurt Zwicky hät fascht wie n ä Wältmeischter ghandöörgelet, schwungvoll, fählerloos und eebig variantäriich hät er mit Volkstümmlichem bekannt gmacht, hät Zwüschemuusig abotä, wänn ds Käthi ä Pause iigleit hät und so ganz heiteri musikalischi Sachä uuftischet. Es isch zwüscheddurä sogar mitgsungä wordä.
Ds Käthi Rhyner hät sich nüd äxtra müessä voorschtelle, ma khännt sini munter und dialeäggtschtarch Verzellkunscht. Wiit usem Nordä sigs aagreist, häts gmeint und schuu druf higwisä, mit wellnä Uusdrügg as mich sich hütigstags Grüezi seit. Da muess mä schu fascht Aenglisch chännä, zum fundiert druus z chuu.
Mit viiel Sorgfalt und Wätschätzig häts druuf hiigwiesä, we dr Hans albigs dichtet heig. Oeppedie heig ds Sandmännli gfählt und so siged mängi Kolumne, Bühnischtugg und Gschichtä i dr Nacht entschtandä. Es heig das albigs als Erschti z Läsä überchuu.
Aeso hät mä mit dr Aaleggi für d Teilnahm a dr Landsgmeind, d Handhabig vum tigge Memorial zur Landsgmeind, äm richtige Hanäschtu uf dr Bühni, äm mügliche Uusschmügge vu dem «Jahrbuech», äm Schprachverschtändnis – was de amtlich Uusdruggswiis betrifft – und anderem Bekanntschaft gmacht.
Mä isch bim Uruehschtand glandet – besser bekannt als Pangsionierig. Mä hät ja kei Ferie mii, ma muess zwüsched Altersturne, Wältreisä, Bsüech vu kulturelle Veraschtaltigä, Chuechäfabrikaziune, Läsä, Iichaufstourneeä, äm Miverfolgä vu liecht schmalzigä Film im huuseigetä Pantoffelkino, Jodel- und Schwingfäschtbsüech und uuswehlä. Nu schu da chunnnt mä fascht z Schwitzä.
Und will dr Hans Rhyner 41 Jahr lang Lehrer gsi isch, hät i dr Fülli vu allem dr Pestalozzi,d s Schuelschwimme, ä Bsuech vum Schuelinschpeggtär und anders nüd törfä fählä. Mä hät erfahrä, we dr Unterschied zwüsched Hüüsli, Viereggli, WC und Läubi z verschtuu sind.
Und drna isch mä zum «Roschtigä Silber», dr Macht vum Gnom Argentum, em schlimmä Aendi vu dener Sag mit Berggrotte, Geischter, uugschiggtem Iigriffä vu dr wältliche Macht und anderem chuu.
Aes isch sogar zu n ärä Zuegab chuu, nachdem z Käthi Rhyner ä viilnä verdient härzli tangget hät, wo am Entschtuh vu dem Buech mitghulfä händ. Dass mä dä bi «Schpiis und Trangg» – lies Apéro – nuch lang zämebliiebä isch, verschtaht sich wie vu sälbär.
